ພາກວິຊາພາສາຫວຽດສ້າງຕັ້ງຂຶ້ນໃນປີ 2003 ໃນເວລານັ້ນເອີ້ນວ່າ “ພະແນກວິຊາພາສາ ຫວຽດ-ຈີນ” (ໝາຍຄວາມວ່າມີໜ້າທີ່ຄຸ້ມຄອງ 2 ຫຼັກສູດໄປພ້ອມໆກັນ). ພະແນກວິຊາພາສາ ຫວຽດ-ຈີນ ໄດ້ເປີດ ການຮຽນ-ການສອນ ໃນສົກປີ 2003-2004 ໃນຫຼັກສູດປະລິນຍາຕີ. ກ້າວເຂົ້າສູ່ສົກຮຽນ 2004-2005 ພະແນກພາສາຫວຽດ ແລະ ພະແນກພາສາຈີນ ໄດ້ແຍກອອກເປັນ 2 ພະແນກວິຊາຕ່າງຫາກ. ຕໍ່ມາໃນປີ 2010 ຂັ້ນເທິງໄດ້ຕົກລົງໃຫ້ເປັນພາກວິຊາພາສາຫວຽດ ໃນສັງກັດຄະນະອັກສອນສາດ, ມະຫາວິທະຍາໄລ ແຫ່ງຊາດ ວິທະຍາເຂດດົງໂດກ. 

- ເພື່ອກໍ່ສ້າງພະນັກງານນຳທ່ຽວພາສາຫວຽດ, ນັກແປພາສາຫວຽດ, ພະນັກງານຫ້ອງການພາສາ ຫວຽດ ແລະ ນັກວິຊາການໃນຂະແໜງການນຳໃຊ້ພາສາຫວຽດ ສາມາດຕອບສະໜອງໄດ້ຕາມຄວາມ ຮຽກຮ້ອງຕ້ອງການພັດທະນາເສດຖະກິດ-ສັງຄົມແຫ່ງຊາດ.

- ສ້າງໃຫ້ນັກສຶກສາມີແນວຄິດ, ຄຸນສົມບັດ, ສິນທຳປະຕິວັດ, ທັດສະນະການເມືອງທີ່ຖືກຕ້ອງ, ມີແນວຄິດ ຮັກຊາດ, ຮັກລະບອບໃຫມ່, ມີຄວາມຈົງຮັກພັກດີຕໍ່ລັດຖະບານ, ມີຄວາມສາມັກຄີບັນດາເຜົ່າ, ຮູ້ຊ່ວຍເຫຼື່ອເຊິ່ງ ກັນ ແລະກັນ, ຮູ້ຮັກ ແລະອະນຸລັກຮີດຄອງປະເພນີອັນດີງາມຂອງຊາດ ແລະມີຄວາມພູມໃຈໃນຄວາມເປັນຊາດລາວ.

- ສ້າງໃຫ້ນັກສຶກສາມີຄວາມຮູ້ຄວາມສາມາດທາງດ້ານວິຊາການ, ມີຈັນຍາບັນ, ຮັກອາຊີບຂອງຕົນເອງກ່ຽວ ກັບສາຂາພາສາຫວຽດ.

- ຜູ້ສຳເລັດການສຶກສາໃນສາຂາວິຊານີ້ ສາມາດເຮັດວຽກນຳບໍລິສັດທ່ອງທ່ຽວ, ອົງການຕ່າງໆຂອງຫວຽດ ແລະ ອົງການຂອງລັດຖະບານຫວຽດ ຕາມນະໂຍບາຍການພົວພັນສາກົນຂອງລັດຖະບານ. ຜູ້ສຳເລັດການສຶກສາ ຕາມຫຼັກສູດດັ່ງກ່າວ ສາມາດຄົ້ນຄ້ວາລົງເລິກ ຂະແໜງວິຊາໃນລະດັບທີ່ສູງກວ່າ ໃນສາຂາວິຊາທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ.

ພາກວິຊາພາສາຫວຽດ ຂຽນຫຍໍ້ວ່າ “ພພວ” ເປັນພາກວິຊາໜຶ່ງ, ຊຶ່ງສັງກັດຢູ່ໃນໂຄງປະກອບການ ຈັດຕັ້ງຂອງຄະນະອັກສອນສາດ ມະຫາວິທະຍາໄລແຫ່ງຊາດ, ມີພາລະບົດບາດ ໃນການຈັດຕັ້ງການຮຽນ-ການສອນໃນຫຼັກສູດປະລິນຍາຕີ, ຈັດຕັ້ງກິດຈະກຳການເຄື່ອນໄຫວດ້ານຕ່າງໆ ແລະ ການຮ່ວມມືກັບຝ່າຍຫວຽດນາມ ພາຍໃຕ້ການຊີ້ນຳຂອງ ຄະນະອັກສອນສາດ. ເປົ້າໝາຍຂອງຫຼັກສູດ ແມ່ນຄຳນຶງເຖິງຄວາມຕ້ອງການຂອງສັງຄົມເປັນສິ່ງສໍາຄັນ ໂດຍແນໃສ່ສ້າງນັກສຶກສາ ໃຫ້ມີຄວາມຮູ້ຄວາມສາມາດ ທາງດ້ານພາສາຫວຽດລະດັບແນ່ນອນໃດໜຶ່ງ ໃຫ້ສາມາດນຳເອົາຄວາມຮູ້ ດ້ານພາສາຫວຽດ ແລະ ການຮຽນຮູ້ກ່ຽວກັບຫວຽດນາມ ເພື່ອສ້າງໂອກາດໃນການປະກອບອາຊີບ, ເປັນບຸກຄະລາກອນທີ່ດີ, ມີຄຸນນະພາບ, ພຽບພ້ອມດ້ວຍຄຸນສົມບັດ ແລະ ມີຈັນຍາບັນໃນວິຊາຊີບຂອງຕົນ, ຝຶກຝົນຫຼໍ່ຫຼອມຄຸນສົມບັດຕາມແນວທາງຂອງ ພັກ ແລະ ລັດ ວາງອອກ.

ປທ. ນາງ ມຸກ​ສີ​ຄາມ ​ເຂັມ​ດີ

ຊຈ. ປທ. ນາງ ລັນ​ນີ ​ເພັດ​ນີອອນ

3. ອາຈານສອນ ຊື່ ແລະນາມສະກຸນ

- ປທ. ນາງ ມຸກ​ສີ​ຄາມ ​ເຂັມ​ດີ

- ຊຈ.ປທ. ນາງ ລັນ​ນີ ​ເພັດ​ນີອອນ

- ປທ. ນາງ ດູ​ໄວ ບຸດ​ດາ​ຮ່າວ

- ປທ. ນາງ ນຸ່ນທອງ ດວງ​ບຸດ​ດີ